Ndërtimi i rrugës Deçan – Plavë, ky është propozimi i Ramosajt

Kryetari i Ramosaj propozon zgjidhje për ndërtimin e rrugës Deçan – Plavë.

Kryetari i Deçanit Bashkim Ramosaj ka propozuar një̈ zgjidhje për ndërtimin e rrugës Deçan – Plavë.

Mëngjesi i së hënës Bashkim Ramosajn e gjeti në rrugën Deçan-Plavë.

Kryetari i Deçanit nga këtu paralajmëroi rinisjen e punimeve në këtë rrugë.

Ai pos kësaj thumboi kryeministrin Avdullah Hoti, duke thënë se kur pezullohen punimet duhet ardhur me zgjidhjet e duhura më pas.

E ky nuk ishte veprimi vetëm i Bashkim Ramosajt gjatë kësaj të hëne.

Ai u ka nisur një letër të hapur krerëve të shtetit, ku ka propozuar zgjidhjen për këtë problem të krijuar.

Por, për fillim në këtë letër ai ka listuar fatkeqësitë që sipas tij i janë shkaktuar komunës që ai udhëheq.

Pos kësaj Ramosaj, në listën e dëmeve që i janë bërë Deçanit ka përmendur edhe vendimin e Gjykatës Kushtetuese, ku Manastirit të Deçanit i jepen 24 hektar tokë të ndërmarrjeve Apiko dhe Iliria.

Ramosaj, tutje ka listuar edhe 15 kërkesa, ku sipas tij do iu bëhej zgjidhja e këtyre problemeve, si dhe do lehtësohej kërkesa e qytetarëve të Deçanit.

Ndërkohë, gjatë ditës zyra e kryeministri Avdullah Hoti, nuk ka bërë ndonjë reagim.

Por, një ditë më parë ata kanë lëshuar një komunikatë për media ku njoftohej se kanë kërkuar pezullimin e punimeve në këtë rrugë.

Sipas Hotit, një pjesë e kësaj rruge prek zonën e veçantë të mbrojtur të Manastirit të Deçanit.

Por, sipas kësaj komunikate shefi i qeverisë vlerëson rëndësinë jetike që ka kjo rrugë për qytetarët e kësaj ane dhe mbështet shqyrtimin e të gjitha mundësive ligjore dhe praktike në terren për ta kompletuar këtë rrugë që e lidh Republikën e Kosovës me Republikën e Malit të Zi.